أنواع العزل الحراري لزجاج السيارات: والفرق بين العزل والتظليل

عربية واقفة في الشمس في أغسطس: الدركسيون ما بيتمسكش، والتكييف محتاج وقت عشان يلحق. والحل اللي الكل بيقترحه «ركّب عزل». بس «عزل» كلمة واسعة، وتحتها أفلام بتبرّد فعلًا وأفلام بتغمّق وخلاص.

ده دليل أنواع العزل الحراري لزجاج السيارات، واللي تسأل عنه قبل ما تدفع.

العربية بتسخن جوه ليه؟

لأن الزجاج بيدخّل أشعة الشمس وما بيطلّعش الحرارة. وأشعة الشمس ثلاث أنواع:

• الأشعة تحت الحمرا (IR): ما بتتشافش، وهي حوالي نص طاقة الشمس. دي اللي بتحسها سخونة على جلدك.
• الضوء المرئي: اللي بنشوف بيه، وبيشيل جزء كبير من الطاقة برضه.
• الأشعة فوق البنفسجية (UV): جزء صغير من الطاقة، بس هي اللي بتبهّت الفرش والتابلوه مع السنين.

فيلم العزل بيتركّب على الزجاج عشان يحجب جزء من الأشعة دي قبل ما تدخل.

إيه الفرق بين العزل الحراري والتظليل؟

التظليل بيقلل الضوء، والعزل بيقلل الحرارة. ودول مش نفس الحاجة.

الغلطة المشهورة إن الفيلم الغامق هو اللي بيعزل. درجة الغمقان معناها بس إن ضوء أقل بيعدّي. أما الأشعة تحت الحمرا فمالهاش علاقة بلون الفيلم: فيلم شفاف ممكن يحجب منها أكتر من فيلم غامق رخيص.

وعشان كده العزل الحراري الشفاف اللي بنركّبه ما بيغمّقش الزجاج: شغلته الحرارة، وبيبرّد من غير ما لون الزجاج يتغير.

إيه أنواع العزل الحراري لزجاج السيارات؟

أربع أنواع أساسية في السوق:

• المصبوغ: الأرخص. بيغمّق الزجاج، وعزله للحرارة قليل، ولونه بيبهت مع الوقت.
• المعدني: فيه طبقة معدن بتعكس الحرارة. بيعزل كويس، بس ممكن يأثر على إشارة الموبايل والـ GPS.
• الكربون: من غير معدن، فمفيش مشكلة إشارة، ولونه أثبت من المصبوغ.
• السيراميك أو النانو سيراميك: بيركّز على حجب الأشعة تحت الحمرا من غير معدن، وممكن يكون شفاف. وده أغلى نوع في العادة.

واسم «نانو سيراميك» بيتقال كمان على طبقة سائلة مالهاش علاقة بالعزل. الفرق في نانو سيراميك للزجاج ولا عزل حراري؟.

أسأل على أنهي أرقام؟

• نفاذ الضوء (VLT): كل ما الرقم أعلى، الفيلم أفتح.
• حجب الأشعة تحت الحمرا (IR): الرقم الكبير اللي في الإعلانات.
• حجب الحرارة الكلية (TSER): الأقرب للي بتحس بيه، وفي العادة أقل من رقم الـ IR.
• الماركة: اسم الشركة المصنّعة.

وقارن نفس الرقم بنفس الرقم. «98% أشعة تحت حمرا» و«60% حرارة كلية» مقياسين مختلفين. والـ 98% اللي بنقولها على فيلمنا رقم أشعة تحت حمرا: بحسبة الموقع ده حوالي 57% من حرارة الشمس الكلية.

العزل الحراري في ايجي X

• الفيلم: 3M، شفاف، ومش بيغمّق الزجاج.
• الأداء: بيحجب لحد 98% من الأشعة تحت الحمرا.
• السعر: 3,500 ج.م.
• بعد التركيب: ما تفتحش الشبابيك 3 أيام عشان الفيلم يثبّت.

والعزل الحراري داخل في باقات فيلم الحماية، وبيتركّب لوحده كخدمة. التفاصيل في صفحة العزل الحراري.

وعندنا خدمة منفصلة اسمها فاميه بعزل حراري: 3M، فاميه 30% وعزل حراري 70%، بتتركّب على الأربع أبواب والخلفي، وسعرها 3,500 ج.م. الفرق ببساطة: العزل الشفاف برودة من غير ما لون الزجاج يتغير، والفاميه بعزل حراري تغميق وعزل.